డా. చంద్రశేఖర్ పెమ్మసాని

రైతు కుటుంబంలో జన్మించి, స్వశక్తితో ఎదిగి, అమెరికాలో ఉన్నత వైద్యుడిగా, అనితరసాధ్య ప్రతిభాశాలిగా ఎదిగారు చంద్రశేఖర్‌. తాను నేర్చుకున్న విద్యనే పదుగురికి పంచి “EY Entrepreneur of the year” గా కీర్తి సాధించారు. అకుంఠిత దీక్షతో అసాధారణ స్థాయిలో సేవా కార్యక్రమాలు చేసి, గుంటూరు ప్రజలు గర్వపడే స్థాయికి చేరుకున్నారు.

తాతలది వ్యవసాయం కాగా, తండ్రి పెమ్మసాని సాంబశివరావు వ్యాపార రీత్యా బుర్రిపాలెం గ్రామం నుండి వెళ్లి నరసరావు పేట పట్టణంలో స్థిరపడ్డారు. నరసరావు పేట వాసులకు ఆయన రాజకీయంగా సుపరిచితుడే. తెలుగుదేశం స్థాపించిన నాటి నుండి డాక్టర్‌ కోడెల శివప్రసాద్‌ అనుచరుడిగా ఉంటూ రెండు దశాబ్దాల పాటు పార్టీకి విశిష్ట సేవలందించారు.

అమెరికాలో వైద్యులుగా పనిచేసేందుకు USMLE పరీక్ష రాయవలసి ఉంటుంది. ఈ పరీక్షలోనూ హై పర్సంటైల్‌తో ఉత్తీర్ణులయ్యారు చంద్రశేఖర్‌. అయితే అందుకు 4 వేల డాలర్లు ఖర్చయ్యాయి. చాలామంది ఆశావహుల ఆర్థిక పరిస్థిని అర్థం చేసుకున్న చంద్రశేఖర్‌, తాను నేర్చుకున్న విద్య నుండి భావితరాల కోసం సరళమైన, చవకైన స్టడీ మెటీరియల్‌ను రూపొందించారు. అమెరికా వైద్య విద్యా రంగంలో అదో సంచలనం. ఈ స్టడీ మెటీరియల్‌తోనే “యు వరల్డ్‌” సంస్థని సృష్టించి, చాలామంది వైద్య విద్యార్థులకు అండగా నిలిచారు.

“UWorld” స్టడీ మెటీరియల్‌ చదివినవారు సైతం హై పర్సంటైల్‌తో ఉత్తీర్ణులై, జీవితంలో అత్యున్నత స్థాయిలో స్థిరపడడం విశేషం. అందుకే ప్రపంచంలోని అత్యంత పరివర్తన కలిగిన విద్యా సంస్థల జాబితాలో “UWorld‌” నిలిచింది.